2022 yil 15 iyul kuni Toshkent shahrida O‘zbekiston Respublikasi Oliy Majlisi Qonunchilik palatasi va Senati Kengashlarining qo‘shma majlisi bo‘lib o‘tdi.

Qo‘shma majlisda O‘zbekiston Respublikasi Oliy Majlisining Inson huquqlari bo‘yicha vakili (ombudsman)ning Qoraqalpog‘iston Respublikasida inson huquq va erkinliklarini taʼminlash masalasiga doir murojaati ko‘rib chiqildi.

Majlisda Oliy Majlis palatalari Kengashlarining 2022 yil iyul oyida Qoraqalpog‘iston Respublikasida yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya tuzish to‘g‘risidagi qo‘shma qarori qabul qilindi.

Mazkur qaror bilan Komissiya tarkibi va Komissiya to‘g‘risidagi nizom ham tasdiqlandi.

Komissiya tarkibiga O‘zbekiston Respublikasi Oliy Majlisi vakillari va xalq deputatlari, nodavlat notijorat va jamoat tashkilotlari rahbarlari hamda xodimlari kiritildi.

Komissiyaga rahbarlik qilish O‘zbekiston Respublikasi Oliy Majlisining Inson huquqlari bo‘yicha vakili F.Eshmatova zimmasiga yuklatildi.

O‘tkazilgan tekshiruv natijalari eʼlon qilinadi va O‘zbekiston jamoatchiligi va jahon hamjamiyatiga yetkaziladi.

Shuning bilan O‘zbekiston Respublikasi Oliy Majlisi Qonunchilik palatasi va Senati Kengashlarining qo‘shma majlisi o‘z ishini yakunladi.

O'zbekiston Respublikasi
Oliy Majlisi Senatining
Axborot xizmati

Ўзбекистон Республикаси Олий Мажлиси Қонунчилик палатасининг Кенгаши ва
Ўзбекистон Республикаси Олий Мажлиси Сенатининг Кенгаши
ҚАРОРИ

15.07.2022 й.
№ 2313–IV/КҚ-387–IV.

Қорақалпоғистон Республикасида юз берган ҳолатлар
ва воқеаларни ўрганиш масалалари тўғрисида

Ўзбекистон Республикаси Олий Мажлисининг Инсон ҳуқуқлари бўйича вакилининг (омбудсманнинг) Қорақалпоғистон Республикасида инсон ҳуқуқлари ва эркинликларини таъминлаш масаласига доир мурожаатини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши

ҚАРОР ҚИЛАДИЛАР:

1. Қорақалпоғистон Республикасида 2022 йил июль ойида юз берган ҳолатлар ва воқеаларни ўрганиш бўйича комиссия (бундан буён матнда Комиссия деб юритилади) 1-иловага мувофиқ таркибда тузилсин.

2. Қорақалпоғистон Республикасида 2022 йил июль ойида юз берган ҳолатлар ва воқеаларни ўрганиш бўйича комиссия тўғрисидаги низом 2-иловага мувофиқ тасдиқлансин.

3. Комиссия:

инсон ҳуқуқлари, эркинликларини ҳамда қонуний манфаатларини бузиш билан боғлиқ ҳолатлар ва ҳодисаларни чуқур ўрганиб чиқсин;

шаффофликни таъминлаш мақсадида Комиссия фаолияти доирасида амалга оширилаётган ишлар ҳужжатлаштирилишини, шу жумладан аудио-, фото- ва видео қайд этиш воситалари ёрдамида қайд этилишини ташкил этсин;

ўрганиш натижалари бўйича якуний ахборот тайёрлаб, Ўзбекистон Республикаси Олий Мажлисининг палаталарига тақдим этсин.

4. Ўзбекистон Республикаси Молия вазирлиги Комиссия фаолиятини амалга ошириш учун Ўзбекистон Республикаси Давлат бюджетидан зарур маблағлар ажратилишини таъминласин.

5. Ушбу Қўшма қарор қабул қилинган кундан эътиборан кучга киради.