Мамлакатимиз Президенти ташаббуси билан нашр қилинган “Ғалаба боғи фалсафаси” ҳамда “Иккинчи жаҳон уруши ва Ўзбекистон халқи” китоблари Беларусда тақдим этилди
МИНСК, 5 август. /«Дунё» АА/. Беларусь Савдо-саноат палатаси томонидан ташкил этилган “Савдо маслаҳатчиси куни – 2022” тадбири кун тартибидаги “Брест қаҳрамон қалъаси” ёдгорлик мажмуини зиёрат қилиш доирасида мамлакатимиз элчихонаси Ўзбекистон Республикаси Президенти ташаббуси билан чоп этилган “Ғалаба боғи фалсафаси” ҳамда “Иккинчи жаҳон уруши ва Ўзбекистон халқи” китобларининг тақдимотини уюштирди, деб хабар бермоқда “Дунё” АА мухбири.Унда Беларуснинг мутасадди идоралари раҳбарияти, дипломатия корпуси, академик муассасалар ва тадбиркор доираларнинг вакиллари ҳамда қалъа зиёратчилари иштирок этди.
Халқимизнинг 1941-1945 йиллардаги Иккинчи жаҳон урушида эришилган буюк ғалабага қўшган муносиб ҳиссаси, фашизмга қарши жангларда қатнашган юртдошларимиз кўрсатган қаҳрамонликлар, ўша мудҳиш даврдаги фронт орти таъминоти, яъни Ўзбекистондан жанг майдонларига мунтазам равишда етказиб турилган қурол-яроғ, озиқ-овқат, кийим-кечак ва бошқа маҳсулотлар ҳужумда кескин бурилиш ясалишига сабаб бўлганлиги тўғрисидаги атрофлича маълумотлар тақдимот иштирокчиларининг эътиборига ҳавола қилинди.
Ўз навбатида, Ёдгорлик комплекси директори ўринбосари Елена Митюкова урушнинг илк кунида Брест қалъасида фашизм ҳамласига кўкрагини қалқон қилганлар орасида ўзбек жангчилари ҳам бўлгани, улар том маънода жасорат кўрсатишгани ҳолда душманга қарши мардонавор курашганини алоҳида таъкидлади. Жумладан, Жиззах вилояти Зомин туманида таваллуд топган Авазмат Ниёзматов қалъадан чиқиб кетаётган қўшинларни ҳимоя қилиб, ўз ўрнидан жилмай босқинчилар билан мардларча жанг қилгани, кучлар тенг бўлмаган олишувда душманнинг ҳужумини тўхтатиб туриш вақтида, яъни урушнинг биринчи кунида қаҳрамонларча ҳалок бўлгани воқеаси тилга олинди.
Тақдимотда сўз олган Беларусь Савдо-саноат палатаси халқаро ҳамкорлик бошқармаси бошлиғи Александр Головорев ҳам урушнинг суронли йилларида жанг кетаётган ҳудудларнинг, шу жумладан, Беларуснинг минглаб зиёлилари, олимлари ва етим болаларига Ўзбекистон бошпана бергани, ярадорларни даволагани сингари ўзбек халқининг фашизм устидан қозонилган ғалабага қўшган улкан ҳиссасига урғу берар экан, беларусь халқи бундан ҳамиша миннатдор эканлигини алоҳида таъкидлади.
