O‘zbekiston Respublikasi prezidenti Rossiya Davlat Dumasi raisi bilan uchrashuv o‘tkazdi
O‘zbekiston Respublikasi prezidenti Shavkat Mirziyoyev 28 noyabr kuni Rossiya Federatsiyasi Federal Majlisining Davlat Dumasi raisi Vyacheslav Volodin boshchiligidagi Rossiya parlament delegatsiyasini qabul qildi.
Uchrashuv boshida Vyacheslav Volodin O‘zbekiston rahbariga Rossiya Federatsiyasi Prezidenti Vladimir Putinning tabrik so‘zlari va eng yaxshi tilaklarini etkazdi.
O‘zbekiston va Rossiya o‘rtasidagi keng qamrovli strategik sheriklik va ittifoqchilik munosabatlarini yana-da chuqurlashtirish, siyosiy, savdo-iqtisodiy va madaniy-gumanitar sohalardagi hamkorlikni rivojlantirish masalalari muhokama qilindi.
So‘nggi yillarda parlamentlararo aloqalarning yuqori dinamikasi, O‘zbekiston va Rossiya hududlarida ikki mamlakat parlamentlari palatalari va qo‘mitalari rahbariyati darajasida yangi formatdagi uchrashuvlar o‘tkazish amaliyoti joriy etilgani alohida qayd etildi.
Yangi tashkil etilgan parlamentlararo hamkorlik komissiyasining faoliyati Qonunchilik ishlarini tashkil etish sohasida ikki tomonlama hamkorlikni yana-da mustahkamlash va tajriba almashishni kengaytirishga xizmat qilishi ta‘kidlandi.
Iqtisodiy hamkorlikning ijobiy natijalari mamnuniyat bilan qayd etildi. Joriy yil boshidan buyon ikki tomonlama tovar aylanmasi uchdan biriga o‘sdi.
Rossiya investitsiyalarini jalb qilgan holda O‘zbekistonda neft-gaz, energetika, kon-metallurgiya, qishloq xo‘jaligi sohalarida qo‘shma loyihalar muvaffaqiyatli amalga oshirilmoqda. Ikki mamlakat mintaqalari o‘rtasidagi ishbilarmonlik aloqalari tobora kengayib bormoqda.
Samarali hamkorlik madaniy-gumanitar tekislikda, birinchi navbatda ta‘lim va fan sohasida, shuningdek turizm sohasida rivojlanmoqda.
Rossiya delegatsiyasi a‘zolari O‘zbekistonda islohotlar yillarida ijtimoiy-iqtisodiy rivojlanish, yoshlarni tarbiyalash, sog‘liqni saqlash salohiyatini oshirish, shahar va qishloq infratuzilmasini modernizatsiya qilish sohalarida erishilgan o‘zgarishlarni yuqori baholadilar.