Xalq manfaatlarini hisobga olgan holda
Oliy Majlis Qonunchilik palatasining “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha referendum o‘tkazish to‘g‘risidagi masalani ko‘rib chiqishga bag‘ishlangan navbatdagi majlisi o‘z ishini davom ettirdi.
Yig‘ilishning ikkinchi kuni ishida Konstitutsiyaviy qonunni ishlab chiqish jarayonida eng dolzarb takliflarni bildirgan fuqarolar ishtirok etdi.
Yig‘ilishning birinchi kunida qonun loyihasini atroflicha ko‘rib chiqish chog‘ida deputatlar hujjatni yana-da takomillashtirish bo‘yicha qator takliflarni ilgari surdi. Mas‘ul qo‘mitalar har bir taklifni sinchiklab tahlil qilib, ularning aksariyatini loyiha matnida aks ettirdi.
Yig‘ilishda Konstitutsiyaviy qonun loyihasining o‘tish davri qoidalari moddama-modda muhokama qilindi. Ushbu qoidalar Konstitutsiyaga kiritilgan o‘zgartish va qo‘shimchalarning kuchga kirishi shartlari va tartibini batafsil belgilab beradi.
Yig‘ilishda bildirilgan takliflar asosida Konstitutsiyaviy qonun loyihasi normalari takomillashtirilib, yakuniga yetkazilgani ta‘kidlandi. Bu jarayonda faol ishtirok etgan Konstitutsiyaviy komissiya a‘zolari va deputatlarga minnatdorchilik bildirildi.
Yig‘ilishda so‘zga chiqqanlar fuqarolarimizning fikr-mulohazalari asosida va ularning ko‘magida konstitutsiyaviy islohot referendum yo‘li bilan amalga oshirilishini alohida ta‘kidladilar. Konstitutsiyaning qabul qilinishi xalq irodasining ifodasi bo‘ladi.
Shuningdek, deputatlar Konstitutsiyaviy qonun loyihasi bo‘yicha referendum o‘tkazish sanasini 2023-yil 30-aprelga belgilash va Oliy Majlis Qonunchilik palatasining majlis o‘tkazish to‘g‘risidagi qarori yuzasidan O‘zbekiston Respublikasi Konstitutsiyaviy sudining xulosasini olish masalasini ham qo‘llab-quvvatladilar.
Yangilangan Konstitutsiya ijtimoiy, demokratik-huquqiy va chinakam xalq davlatchiligi asoslarini yaratishi, aholi farovonligini oshirish, huquq va manfaatlarini, inson sha‘ni va qadr-qimmatini yana-da mustahkamlash, liberallashtirishning muhim omiliga aylanishi ta‘kidlandi, hayotning barcha jabhalarini qamrab oladi, shuningdek, yangi O‘zbekiston taraqqiyotida yangi davrni ochadi.
Yig‘ilish yakunlari bo‘yicha deputatlar “O‘zbekiston Respublikasining Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasining referendumini o‘tkazish to‘g‘risida”gi qarorni qabul qildilar.
Qonunchilik palatasining majlisida Konstitutsiyaviy qonunni ishlab chiqish jarayonida eng dolzarb va ahamiyatli takliflarni bildirgan fuqarolarga minnatdorlik bildirildi.
Axborot markazi
Oliy Majlis Qonunchilik palatasi.