Belarus delegatsiyasi Toshkentda bo'lib o'tadigan Parlamentlararo ittifoqning assambleyasi ishida qatnashadi
O'zbekiston elchisi Rahmatulla Nazarov Belarus Milliy majlisi Respublika Kengashi raisi Natalya Kochanova bilan uchrashdi, deb xabar qilmoqda "Dunyo" AA muxbiri.
Suhbat chog'ida keng ko'lamli ikki tomonlama hamkorlikning holati, jumladan, oliy darajada erishilgan kelishuvlar ijrosi yuzasidan fikr almashildi.
Natalya Kochanova mamlakatlarimiz o'rtasidagi uzoq yillik tarixiy, madaniy va iqtisodiy aloqalarni alohida ta'kidladi. U O'zbekiston rahbarining hududlararo hamkorlikni kengaytirish va chuqurlashtirish bo'yicha tashabbusini qo'llab-quvvatlashga tayyorligini bildirdi. Xususan, joriy yilda Vitebsk shahrida o'tkaziladigan uchinchi Belarus-O'zbekiston ayollar forumini yuqori saviyada tashkil etishning muhimligi qayd etildi.
Tomonlar ikki mamlakat yoshlari o'rtasidagi aloqalarni qo'llab-quvvatlash, ular ishtirokida madaniy-ma'rifiy, ilmiy-amaliy va sport tadbirlarini muntazam o'tkazishga alohida e'tibor qaratildi. Mehnat migratsiyasi sohasida yaqin hamkorlikni yo'lga qo'yishdan manfaatdorlik bildirildi.
Uchrashuvda parlamentlararo sheriklik muvaffaqiyatli rivojlanib borayotgani urg'ulandi. Shuningdek, joriy yil aprel oyida O'zbekistonda bo'lib o'tadigan Parlamentlararo ittifoqning 150-yubiley assambleyasiga ko'rilayotgan tayyorgarlik masalalariga xususida fikr almashildi.
Natalya Kochanova Belarus delegatsiyasi Parlamentlararo ittifoqning navbatdagi assambleyasi ishida qatnashishini tasdiqladi.
Muloqot yakunida O'zbekiston va Belarus o'rtasidagi ko'p qirrali hamkorlikni rivojlantirishda ikki mamlakat parlamentlari imkoniyatlaridan samarali foydalanish muhimligi ta'kidlandi.