O'zbekiston Minskda Ikkinchi jahon urushida qozonilgan g'alabaning 80 yilligiga bag'ishlab o'tkazilgan kitob yarmarkasida ishtirok etdi
12-16-mart kunlari Belarus poytaxtida XXXII Minsk xalqaro kitob ko'rgazma-yarmarkasi bo'lib o'tdi, deb xabar qilmoqda "Dunyo" AA muxbiri.
Bu yilgi kitob ko'rgazma-yarmarkasi Ikkinchi jahon urushida qozonilgan g'alabaning 80 yilligiga bag'ishlandi.
Ta'kidlash kerakki, har yili o'tkazib kelinayotgan mazkur tadbirda O'zbekiston vakillari muntazam ishtirok etib kelmoqda. Yarmarka davomida yurtimizda kitobxonlik madaniyatini rivojlantirish, ijodkorlar, noshirlar va kitob tarqatuvchilar faoliyatini qo'llab-quvvatlash tizimini izchil va samarali tashkil etish borasida olib borilayotgan tizimli ishlarga oid taqdimotlar o'tkaziladi. Bu o'z navbatida, O'zbekistonda amalga oshirilayotgan keng ko'lamli islohotlar, mamlakatimiz boy tarixi, madaniyati, o'zbek xalqining an'analari va qadriyatlarini targ'ib qilishga hissa qo'shayotir.
Joriy yilgi yarmarkada tashkil etilgan O'zbekiston stendi tashkilotchilar va mehmonlarda katta taassurot qoldirdi. Unda O'zbekiston noshirlik uylari tomonidan chop etilgan tarixiy, ilmiy-publitsistik, adabiy-badiiy janrlarga oid 100 dan ortiq kitoblar taqdim etildi.
Minsk xalqaro kitob ko'rgazma-yarmarkasi ijrochi direktori Dmitriy Makarov ko'rgazmada oltinchi marotaba ishtirok etayotgan O'zbekiston vakillariga minnatdorlik bildirdi. "O'zbekiston bosma mahsulotlari sifati va yuqori noshirlik darajasi bilan ajralib turadi. O'zbekiston noshirlik uylari taqdim etgan kitoblar o'rin olgan qiziqarli stend ko'plab tashrif buyuruvchilar diqqatini o'ziga jalb etdi", dedi u.
Belarus tashqi ishlar vaziri o'rinbosari Pavel Utyupin O'zbekiston stendi bilan tanishar ekan, o'zbek xalqi va jasur o'g'lonlarining Ikkinchi jahon urushi davrida ko'rsatgan qahramonliklari va fidokorona mehnati belarus xalqining xotirasida ekanligini hamda Brest qal'asi himoyasida bevosita ishtirok etgan bir necha vatandoshlarimizning nomlari maxsus ekspozitsiyada abadiylashtirilganini bildirdi.